نِسَّالْ تِگْرى مِسِلْ لَهَجَتْ إيْ وافِقْ

رَبِي إسِمى وأَسْتَبْدى, مَالِكْ كُونْ وخَلِقْ

رَبِي حِياى تُو وفَازِعْ, أُوروتْ تُو وخَالِقْ

قُرْآنْ هِگْيا رَبي تُو, حَقْ تُو وصِدِقْ

مُحَمَّد لُؤُكْ رَبي تُو, أمِينْ تُو وصَادِقْ

رُگُومْ أبَاىْ رَبِي تُو, عَاصِي تُو ومُنَافِقْ

دُحُورْ سَدّى ولِتّحيگى, ورُگُومْ قََبِبْ وميرِقْ

دُحُورْعادِلْ تُو, ورُگُومْ مَعْيُوبْ تُو وسارِقْ

دُحُورْ إگِلْ جَنَّتْ شَقى, ورگُومْ رماچ سَقاسِقْ

دُحُورْ إگِلْ إكِّيتْ لأَبى, ورگُومْ إگِلْ سَنِّيتْ سَقَِقْ

جَنَّتْ إگِلْ مُؤمِنْ تِتَاكى, ونارْ إگِلْ كَافِرْ وعاقِقْ

ديرْهُو إگِلْ دُحُورْ لأزنْ, وأدگْ إگِلْ رگُومْ لِنحِق

مَلَكْ دُحُورْتُو وعابِدْ, وشِيطانْ رُگُومْ تُو ومَارِقْ

مَلَكْ دُحُورْتُو وفَرْحانْ, وشِيطانْ رُگُومْ تُو وحارِقْ

إسَاتْ هَرُورْتا ورَماچْ, وجَنَّتْ قِرْطيطْ تا وحَدايِقْ

رَبي غَافِرْتُو وشَديدْ, إسَاتْ بُو وجَنَّتْ لَحاسِبْ وبَقِّقْ

رَبي هَايِباىْ تُو ومَالِكْ لَهَيِّبْ وكَلِّيئْ, رَحِيمْ تُو ورَازِقْ

رَبِي رحِيمْ تُو ومَالِكْ, أَرِضْ لأفَرِحْ وعَستَرْ لأسَّحِقْ

ماىْ وظَحَاىْ أَرِضْ لأفَرْحْ, نِعْمَتْ ربي تُو ورِزِقْ

گِيمْ وزِلامْ رِزِقْ تُو, سَما لأسَّحَقْ إبْ هَدُودْ وبَرِقْ

عادِلْ إِكيتْ لأَسَنى, وزالِمْ سَلِّبْ وقَتِلْ وسَنِّيتْ سَرِقْ

گلى أسِلْ لأَبَدى وبِقِلْ ناقِلْ, وگلى فِرى لَحَزى وشَقايِقْ

حُگُوزْ طِرايِتْ بلِّيعْ, وولَتْ تُو لَتَهَدى إنْدى إيتْ تَأبَلِّقْ

عَادَاتْ لِمِّدْتُو وتَاريكْ أَبِّعِبْ, ونِسَّالْ أكْبارْ لَهَيِِّبْ وحَقايقْ

هِگْيا مَعَلِّمْ تَحَزى ودَرَساىْ, وبيتْ تاكْياتْ تَحَزى وفِلِقْ

نِسَّالْ تِگْرى ظُرُوىْ تُو وأُمُّورْ, دَلائِلْ إيْ لَحَزى ووسَائِقْ

نِسَّالْ تِگْرى ظُرُوي تُو ورُتُّوعْ, إبْ شَفاگْ إيْ لَحَقْقْ

نِسَّالْ ظُرُوي, ديبْ سَواني إيْ بَدّى وديبْ دَقايِقْ

“اخْتِلافُ أَلْسِنَتِكُمْ وَأَلْوَانِكُمْ “هِگْيا رَبي وقُولْ تُو وفايِقْ

هِگْيا سَنِّي تَرْئى وأُكُّوىْ, وسَنِّي إگِلْ أُكُّوىْ إيْ رافِقْ

هِگْيا حَالِفْ تَرْئى وحادِرْ, وفيرْداي شَاهُودْ إيْ شَنِّقْ

هِگْيا گَبَى تَرْئى, ونِسَّالْ تِگْرى منْ حَبَرُوتْ إيْ لَحِمّْقْ

أسِلْ هِگْيا لإي لأَمِّرْ, فِنْگى هِگْيا ولَهجَتْ إيْ فَارِقْ

لَهَجَتْ فِچَلْ تا وناقْسَتْ, مِسِلْ نِسَّالْ تِگْرى إيتْ وافِقْ

نِسَّالْ تِگْرى كامِلْ تُو ودَارِرْ, سَلُوفْ إيْ لَحَزى ورِمِّقْ

هِگْيا أمُّو للأَبى مَبالِسْ رُتُّوعْ إيْ كَتِبْ, وسَني إيْ نَطِقْ

هِگْيا أمْ نِسَّالْ لِتْگاليَا, وهِگْيا ظَرْ تداوَرْ دِيبْ مِشاْطِقْ

نِسَّالْ ظَرْ مَشَگْ تُو ويبوسْ, ونِسَّالْ أمْ شَويتْ تُو ولِبِقْ

مَبالِسْ نِسَّالْ أمُّو لَلِتگارَفْ, قَواعِدْ نِسَّالْ ظَرُّو إيْ طَبِّقْ

مَجْرورْ رَفَعْ ومَنْسُوبْ, ومَبالِسْ رُتُّوعْ سَابِرْ ولَتْوادِقْ

حَرِفْ جَرْ إيْ رفِعْ, وقافْ إي گَبِّئ كُم حرف حَلِقْ

نِسَّالْ أمْ أَسَاسْ تُو وأسِلْ, وأسَاسْ ألَبُو بيتْ إِي نَدِّقْ

حَداديناى سِياقتْ إيْ لأَمِّرْ, دَهَبْ إِيْ فَنْتى مِنْ ورِقْ

طيبَحاى حِرْدو إيْ لأَمِّرْ, حِيايِتْ طَبيحْ وچِگَرا مَارِقْ

حِيايِتْ نَبِّرْ إبْ أرْوحَتا, إيْ تِطَبَّاحْ وچِگَرا إيْ مَلِقْ

عِچَتْ فَارْيَتْ وأَقْرُودا حاطِطْ, إبْ وَلْوَلْ إيتْ وَدِقْ

ظَيرْباىْ إمْبَلْ مَسَارْ ومَفْرَقْ, إِيْ ظَرِبْ وإِيْ فًَرِقْ

مَسَارْ أَلَبُو ومَفْرَقْ, مُورا إِيْ ظَرِبْ ونِوى إِيْ طرِقْ

مَستَى أَلَبُو وحَريچْ, ماى إيْ ستى وعَجينْ إيْ رَچِقْ

أكَلَتْ إمْبَلْ حَليبْ وحِيسَاسْ, حِسْعِتْ تا حِلْقُمْ تَحَنِقْ

دَرَبْ إمْبَلْ ظَفِرْ وگَنْبَتْ, عِيظاتْ سَبِّرْ ومَظْعَنْ فَنْدِقْ

مَطْحَنْ إمْبَلْ مُوقَريتْ ومِدَّتْ, إيْ تِتْوَقِّرْ وإيتْ دقِقْ

حَلِيبْ ناظَفَتْ عَنبَرتُو, وحَلِيبْ دَارَتْ ماَطَِّقْ وشَابِقْ

حليبْ ناقَتْ حِفُوسْ تُو, وحليبْ وأتْ منُّو إيْْ رَقِقْ

حَليبْ تَبابْ مَطَِّيقْ تُو, وحَليبْ أُمْ منْ شَبيقْ مطَِّقْ

ظَرِگْ ظَهايْ شِبحْ لأمَكِكْ, وماي حُفُونْ چِيوا لَحاقِقْ

ديبْ شَقُوتْ لتتْكرى إيْ تقَبِّلْ, شَقُوتْ تأكِّبْ وتْ وشِّقْ

لإيْ حَرا حَريرْ إيْ لَبِّسْ, ولإِيْ زَراء وَنَّا إيْ لَقالِقْ

حُو لَحَمّى ولِتْبأسْ, وإكُّوىْ إسَاتْ لَحَبِعْ وحَرائِقْ

گُلُولْ ونُؤُشْ إيْ لِتَّحمّو, حميتْ عَاقِلْ لأمِّرا وبالِقْ

مِفْرارْ أَلَبُو ومِعيارْ,طُلُّوقْ إيْ لأسِّرْ وأُسُورْ إيْ طلِّقْ

واقي حِميدْ رَكِبْ وحَمْدى, وهُكُّوىْ فِنْچِِيچِْ وعِنْكِّلىْ فَراچِقْ

سنِّي لتّحَمّى ولِتّحَمّدْ, وإكُّوىْ شُوكْ لَراكِِّزُّو وهِدَمْ لَحاچِقْ

فَدَابْ لِتْظاگَمُ أسِكْ لِتْلَبى, ونُؤُشْ لِتَّعلَمْ أسِكْ لأبَلِّقْ

عالِمْ لِتْگيگى وقَافِلْ لِتْرَسَعْ, گيگا تُرُودْ أَلَبُو وحامِقْ

تاجِرْ لِتْسَلَّفْ وراتِعْ لِتَّحَگزْ, سَلُوفْ هايِبْ ألَبُو ورامِقْ

لامِدْ إبْ قِلَمْ لَحَناگْگْ وإبْ أفُوهُو لأدَّاهى, وأدامْ إگلُو لِنعِقْ

وُلُّوفْ هِگْيا إيْ قَبِظْ وإيْ لِتِّهَكّى, إبَْ بَيْنُو لأدَّاهى وشَنادِقْ

هِگْيا أمْ ظِنْعِتْ تا وكَابْرَتْ, إبْ لِبُّو لِتَالَيا إسِكْتِ بَدّى وتْوَدِّقْ

روابط قصيرة: https://www.farajat.net/ar/?p=9846