بارِيهْ گِبَأ وإتْ گبَيْ سِكَبْ

شعر بالتقرى

بقلم: موسى ضرار

إِبْ سِمِيتْ رَبِي أَنَبِتْ, مَالكْ أرِدْ وكُوكَبْ

مِن شُومْ عالي, هَبَىْ إِتْ مُودأيُو إِدَيْ بُو وزَنَبْ

شُومْ عَالِي لاجِئ تُو, مِنْ رَييمْ لأَنُوكِيْ ولِتْكَالَبْ

مِنْ رَيِيمْ إِيْ لأَدْهِىْ, ومِنْ قُرُوبْ إِيْ لِتْشَابَبْ

عَالِي عِلِيتاىْ تُو, شُومْ مَا مِنْ گَبِئْ إِيْ لِتَّعَلَبْ

مِنْ لِتََّهَاگِى إِيْ لِتْسَمَعْ, ومِنْ لِتْگَسِّى إِيْ لِتَّحَسّبْ

هَبَىْ إِتْ مُودأيُو عَزِيزْتُو, لِسَفْري ولِظْگَبْ

أَرِدْ بُو لِتَّحَرَسْ ولِتْبَتَّك, دَارَتْ بُو ولِّدْ وتِتَّحَلَبْ

مايْ بُو وعِجِيْ قَماجِلّي, فَرّى بُو بَلَسْ وعِنَبْ

إِبَنْ بُو وشَمْشَمْ, ورِقْ گَبِئْ مِنْ نُو ودَهَبْ

مِدِنْ بُو وعِيماتْ, نِيواتْ بُو باظِعْ وعَسَبْ

هِگْيا بُو وعَاداتْ لِمُودْ, فِتِحْ بُو گَلَدْ وأَدَبْ

دِينْ بُو وحَبَنْ , شَرَفْ بُو وحَسَبْ

وُلودْ تُو ووالِدْ, أَسِلْ بُو ونسَبْ

عَدْ بُو وعِرِدْ, دارْ بُو ومسْكَبْ

حَوْ بُو وحَواتْ, أمْ بُو وأبْ

فتاىْ بُو ومَسْنِي, وَدْعَدْ تُو ووسَّبْ

إدَىْ بُو وإگَر, مانْ بُو وشَنْگَنبْ

عِنْتاتْ بُو لأَتْفازِزْ, دُمَّانْ لِرْئ ودُگَلَبْ

إِزَنْ بُو مِنْ دِهِرْ ووِقِّلْ, لأَتَّنْسِى ولَعَقبْ

أَفْ بُو ونسّالْ طَمْطِمْ, مِرّاقْ بُو وجَبِبْ

آنفْ بُو ظِينَا فَرِگْ, بَدَنْ ومَحَلََبْ

مَالْ بُو وتَبَابْ, حَريرْ لَبسْ وقَسَبْ

مالِكْ مَالُو إيْ سَرِّرُو, ليرَمْ ولِقرَبْ

يهَا حُويِئ شانِنْ گِبَأ, وإبْ سِميتْكَا كِتَبْ

شانِنْ إبْ سِمِيتْ تُو, كُمْ سَراقْ إيْ لِتْوالَبْ

سِمِيتْ عِلامَتْ تا ولِيلا, مِنْ بَدا ومِنْ هَرَبْ

ليلاكا إيْ تَأبْدى, إگِلْ سِمَعَتْكا إيْ تِكْرَبْ

يَهَا ودْعَجِى بارِيهْ گِبَأ وإتْ گبَيْ سِكَبْ

باريهْ سَليمْ تُو, إيْ لِتحَبَاعْ وإيْ لِتْگَلْبَبْ

باريهْ بَرئتُو, أرِوى إيْ نَكُشُّو وأرْقَبْ

بارِيهْ أمِين تُو, بأسْ ألبو وسَبَبْ

بارِيهْ حسَّتْ إي لأمِّر, وإيْ لتْگالَبْ

بارِيهْ, بَعَلْ گَظْ تُو, گِرّاه ألبُو وأنكَبْ

سِمِيتْكَا إيْ تَبدِلْ, وأبَاىْ إيْ تِتَحَسَبْ

إبْ نسَالْكَا تَهَاگِى, وإبْ إدِيكَا حِرَبْ

نسَالْ بِكَا وإدَىْ, حِگِىْ بِكَا وگلَبْ

دارِسْ إنتَا ومُهُورْ, إنگليزْ تَأمِّرْ وعَرَبْ

إبْ هِگْیَاکَا تَهَاگِىْ, ظَفِر إيْ تَبْدْى ودَرَبْ

إب هِگْیاکَا مِنْ تِتََّهَاگِى,عِيبْ ألَبْكَا وعَگَبْ

دِيبْ حِقْفْ أُمْ لَتِدَرَسْ, مِسلْ حَليبْ مِنْ طبْ

إِيْتْ دبَدّى وإيْ تِتْمسَّحْ, مسِلْكا تعَبى ودگَندِبْ

تِتََّهَاگِى إبَّا وتَتَّنْسِى, إمِْبَلْ رادِئِيتْ وطَلَبْ

هِگْیَا أُمْ إبْ إبْرَتْ إيْتْ فَگِّرْ, وإبْ مَنْقّبْ

هِگْیَا أُمْ شُوكََتْ عَقْبَا إيْ كُونْ, كتِتْنَقَبْ

هِگْیَا أُمْ تَارِيكْ بَا وعِلِمْ, رِبِحْ بَا ومَكْسَبْ

هِگْیَا أُمْ عِيمَاتْ تَا, تَاكْيَاتْ بَا ومَحْقَبْ

هِگْیا أُمْ قََلالْ تَا ورِتِّعِتْ, إِيْ تِتْرَكَبْ

وهِگْیا گَانا گِبْدِتَّا وظُوظُيْتْ, إِيْ تِتْدَقَبْ

مِنْكُورْ لَرَبِيْ لأبِّيَا, هِگْیَا إبْ أقْرُودا تِتْقَبَبْ

هِگْیَا إبْ تَاريكَا, لَهَجَتْ تِبَهَلْ وإِيْ تِتْكَتَََبْ

هِگْیَا سَبْ مَتاحِتْ تا, وسَبْ أدَبِرْ لتّعنَاكَبْ

وأنَا شانِنْ أنا إبْ نِسَّاليئ, من أرَيمْ وأقَرِبْ

أُمُُّورْ تُو نِسَّاليئ, دِيبْ گَادْموُتاتْ وعَرائَيبْ

دِيبْ سَاحِلْ لأتََّهاجْكنِي, ودِيبْ بَرْكا رَحِيبْ

دِيبْ بَاظِعْ لأتََّهاجْكنِي, ودِيبْ گَدْگَدْ وشِعِيبْ

جنسيئ تِگْرىْ تُو, أسِلْ بِيئْ وأبِّعيبْ

هگيايئ تِگْرايتْ تَا, مَاىْ تَسَتينِي وحَليبْ

مَاىْ عَنْسَبا تَسَتينِي, ومَاىْ لابَا ومِظِبْ

بادْيَتْ إيْ كُونْ وهَاسَتْ, هِگْيَا حَادِرْ تا وقََايبْ

روابط قصيرة: https://www.farajat.net/ar/?p=3591